اب اور تب !
کہا اس نے ـــــــــــــــ
مجھے تب واقعی تم سے محبت تھی
کہا میں نے ـــــــــــــــــــ
مجھے تو آج بھی تم سے محبت ہے
وہ تب کی بات کرتی ہے
میں اب کی بات کرتا ہوں
مگر جو فاصلہ تب اور اب کے درمیاں حائل ہے
وہ ہم سے تو مل کر بھی سمیٹا جا نہیں سکتا
وہ اب تک آ نہیں سکتی
میں تب کو پا نہیں سکتا !!

Read in Roman

کیا ہے جو پیار تو پڑے گا نبھانا
رکھ دیا قدموں میں دل نذرانہ
قبول کر لو۔۔۔۔۔

فلم: دل میرا دھڑکن تیری (1968)۔۔ گلوکار: احمد رشدی
موسیقار: ماسٹر عنایت، شاعری: قتیل شفائی

آو کوئی تفریح کا سامان کیا جائے
پھر سے کسی واعظ کو پریشان کیا جائے

بے لغزشِ پا مست ہوں اُن آنکھوں سے پی کر
یوں محتسبِ شہر کو حیران کیا جائے

ہر شے سے مقدس ہے خیالات کا رشتہ
کیوں مصلحتوں پر اسے قربان کیا جائے

مفلس کے بدن کو بھی ہے چادر کی ضرورت
اب کھل کے مزاروں پہ یہ اعلان کیا جائے

اغیار کے ہاتھوں میں ہوں جس ملک کی باگیں
معزول ہر اس ملک کا سلطان کیا جائے

وہ شخص جو دیوانوں کی عزّت نہیں کرتا
اس شخص کا بھی چاک گریبان کیا جائے

پہلے بھی قتیلؔ آنکھوں نے کھائے کئی دھوکے
اب اور نہ بینائی کا نقصان کیا جائے

قتیل شفائی

جب سے آیا ہےترے پیار کا موسم جاناں
دِل میں رہتی ہے لگاتار چھما چھم جاناں

زخم جو تم نے دیے اُن کا سندیسہ یہ ہے
بھیجنا اب نہ خُدارا کوئی مرہم جاناں

جل رہے تھے مری پلکوں پہ جو یادوں کے چراغ
اب تو اُن کی بھی لویں ہو گئیں مدہم جاناں

رُک گئی سانس، بچھڑنے کی گھڑی جب آئی
دل مگر پھر بھی دھڑکتا رہا پیہم جاناں

باندھ لوں میں بھی تری یاد کے گھنگھرو لیکن
رقص کرنا بھی تڑپنے سے نہیں کم جاناں

تو نے چھوڑا نہ کسی ردِ عمل کے قابل
اب مرا شعر، نہ شُعلہ ہے نہ شبنم جاناں

جانے کیا تجھ سے ہوئی بات کہ گُم صُم ہے قتیلؔ
اب تِرا نام بھی لیتا ہے وہ کم کم جاناں

Read in Roman

جب کسی جام کو ہونٹوں سے لگایا میں نے
رقص کرتا ہوا دیکھا ترا سایا میں نے

مجھ سے مت پوچھ مرے محتسب شہر سے پوچھ
کیوں تیری آنکھ کو پیمانہ بنایا میں نے ؟

لوگ کہتے ہیں قصیدہ وہ ترے حسن کا تھا
عام سا گیت جو محفل میں سنایا میں نے

میکدہ بند تھا لیکن جونہی گرجا بادل
اپنی توبہ کو چٹختا ہوا پایا میں نے

شعر و نغمات کا رشتہ کبھی ٹوٹا نہ قتیل
جب غزل بن کے وہ آیا اُسے گایا میں نے . . . !

Read in Roman

دل لگا بیٹھا ہوں لاہور کے ہنگاموں سے
پیار ہے پھر بھی ہری پور، تری شاموں سے

کبھی آندھی، کبھی شُعلہ، کبھی نغمہ، کبھی رنگ
اپنا ماضی مجھے یاد آئے کئی ناموں سے

ایک وہ دن کہ بناں دید تڑپ جاتے تھے
ایک یہ دن کہ بہل جاتے ہیں پیغاموں سے

جب مرے ہاتھ پہ کانٹوں نے دیا تھا بوسہ
وہ مرا پہلا تعارف تھا گُل انداموں سے

جان و دل دے کے محّبت کے خریدار بنے
یہ کھری چیز تو مِلتی ہے کھرے داموں سے

چور بازار میں بِکنے نہ پُہنچ جائے کہیں
جِنسِ ایماں کو نکلوائیے گوداموں سے

پیروی حضرتِ غالبؔ کی ہوئی نصف قتیل
مئے تو ملتی نہیں رغبت ہے فقط آموں سے

Read in Roman

کششِ جمال
قدم قدم پہ کئی خوش جمال ہین لیکن
کسی میں بات کہاں میرے مہ جبیں جیسی
نگاہ جو بھی اُٹھے اس کے خال و خد پہ گرے
کشش ضرور کوئی اس میں ہے زمیں جیسی

Read in Roman

معجزہ
بشر کے رُوپ میں اِک دلربا طلِسم بنے
شفق میں دُھوپ ملائیں تو اُس کا جسم بنے
وہ معجزات کی حد تک پہنچ گیا ہے قتیلؔ
حروف کوئی بھی لکھوں اُسی کا اِسم بنے

Read in Roman

وہ ساون جس میں زلفوں کی گھٹا چھائی نہیں ہوتی
جو برسے بھی تو سیراب اپنی تنہائی نہیں ہوتی

جنابِ عشق کرتے ہیں کرم کُچھ خاص لوگوں پر
ہر انسان کے مقدر میں تو رُسوائی نہیں ہوتی

سمندر پر سکوں ہے اس لیے گہرا بھی ہے ورنہ
مچلتی ندیوں میں کوئی گہرائی نہیں ہوتی

یہ واعظ ہے ، نہیں تقریر میں رکھتا جواب اپنا
مگر اس شخص کی باتوں میں سچائی نہیں ہوتی

جہاں ساقی کی ایما پر کوئی کم ظرف آ بیٹھے
وہاں خوش ذوق رندوں کی پزیرائی نہیں ہوتی

کبھی چہرے بدل کر بھی یہاں کچھ لوگ آتے ہیں
کبھی کُچھ دیکھتی آنکھوں میں بینائی نہیں ہوتی

قتیلؔ اکثر یہ دیکھا ہے کسی مفلس کے آنگن میں
برات آئے تو اس کے ساتھ شہنائی نہیں ہوتی

قتیلؔ اُس شخص کا کیا واسطہ میرے قبیلے سے!
وفا کے جُرم میں جس نے سزا پائی نہیں ہوتی

Read in Roman

ہوا کی لہر کوئی چھوکے میرے یار سے آئی
کوئی تازہ خبر یوں بھی سمندر پار سے آئی

لبوں سے کم اور آنکھوں سے بہت کرتا ہے وہ باتیں
بلاغت اس میں یہ پابندیِ اظہار سے آئی

وہ اس کی گفتگو، کلیاں چٹکنے کی صدا جیسے
یہ نرمی اس کے لہجے میں ہمارے پیار سے آئی

کشش رکھتا نہیں اب پھول میرے واسطے کوئی
کہ مجھ تک ہر مہک اُس زلفِ خوشبودار سے آئی

یہاں ہے جو بھی یوسف،خود زلیخاؤں کا گاہک ہے
روایت یہ نئی کیا جانے کس بازار سے آئی

وہ اک مغرور سی لڑکی،خوشی جس کا تخلص ہے
مرے پاس آگئی لیکن بڑے اصرار سے آئی

اندھیروں نے قتیل ؔاکثراُسی دیوار سے جھانکا
اُتر کر دھوپ میرے گھر میں جس دیوار سے آئی

Read in Roman